Dizayner ilə işləyərkən bizim öhdəliklərimiz
Adətən ev və yaxud ofisləri dizayn edərkən istədiyimiz tərzi ifadə etməkdə çətinlik çəkirik. Bunun üçün ən yaxşısı dizaynerlərə müraciət etməkdir. Dizaynerə işi təhvil verməzdən əvvəl biz də öz üzərimizə düşən öhdəlikləri icra etməliyik. Əvvəlcə büdcə müəyyənləşdirilməlidir. Bir layihəyə nə qədər pul xərcləyə biləcəyimizi bilən yeganə insan özümüzük.
Köhnə bir evi dizayn olunursa, dəyişdirmək istəmədiyimiz nüansları, sevdiyimiz rəngləri, həyat tərzimizi, hobbilərimizi əvvəlcədən dizaynerə bildirməliyik. Bu şəkildə geniş mətbəxə, böyük masaya və ya yataq otağında bir kitablığa ehtiyacınız olub olmadığını qərarlaşdıra bilər. Məsələn, muzeyləri ziyarət etməyi xoşlayırsınızsa, evinizdə çoxlu sənət əsərləri hətta bir qalereya divarı ola bilər. Səfərləriniz zamanı müəyyən bir ölkəni sevmisinizsə, həmin ölkəni xatırladacaq aksesuar və ya əşyanı yerləşdirmək olar. Bütün bu elementlər və detallar həm büdcəni dəqiq müəyyənləşdirəcək, həm də dizaynerin işini asanlaşdıracaqdır.